Indeks van digters

Stuur jou gedigte na bydraes by roekeloos.co.za Digters is ook welkom om een foto te stuur vir publisering.

Afrika Nag

Eenduisend Afrika nagte
brand in my gemoed
eenduisend kampvure
pols my swerwersbloed

In die vuur se flikkervlamme
dans my nagvuur skadu
’n stomstil ballade
teen spook boomstamme

Die middernaguur
doof my vuur
Afrika sluimer
n bleek maan huiwer
beklee die nag
in ’n silwer sluier

’n Leeu se brul
verskeur die nag
en ’n jakals huil
in die wind

Die naguil staar
’n kiewiet klaag
en die riete
wieg in die wind …
op maat van
die ewige
Afrika ritme

Seisoene van Gister

Seisoene van gister
en eergister
waai in die wind
vergete en verlate
soos laas jaar
se najaarsblaar

Gister se glans
en glorie
verdof
in die stof

Die uurglas
loop leeg
sandsekondes
gly
deur die oog
van die naald
moeiteloos
mateloos
soos die sand
van die see

Gister se najaarsblaar
krimp tot kompos
in die ewige
kringloop
van die kosmos
wyl die winterswind
langverlore
voetspore
vul
met die sand
van die tyd …