Stuur jou gedigte na bydraes@roekeloos.co.za Digters is ook welkom om een foto te stuur vir publisering.

 

Sophia Engelbrecht

Stil eggo

ek weet ek moet bel
maar die afstand
tussen ons siele
is so groot
selfs die
eggo van
hallo-o-o-o
verdwaal
tussen my heuwels
van hartseer
en jou valleie
van teleurstelling

ek weet ek moet bel
maar wat
kan ek sê
as die woorde
ek is lief vir jou
net ons lippe haal
in tye van dood
en die res
net vokale is
wat ongemaklike
stiltes vul

ek weet ek moet bel
ek weet ek moet bel
ek weet ek moet bel

maar ek is bang
die klank van
jou stem
breek deur
die muur
van my hart
en die trane
spoel by my
mond uit

© Sophia Engelbrecht

Melktert in die Hemel

dit is as ek Don Williams
hoor sing
wat herinneringe my omvou
met die reuk van jou
en ek jou sien staan
daai Craven A Menthol
wat so skuins
uit jou mond hang
terwyl jy oor jou bril
vir my loer
vingers krom
met die taal van die lewe
blaai deur jare
se seer en liefde

dan wonder ek
waar is jy nou?

Ma weet ons dink
nog altyd anders
jou stories het gegaan
oor paaie van goud
en Engelekoor
myne oor
‘n
groot
niks
maar ek kan nie help om te dink
(al is dit net vir jou onthalwe)
jy’s besig in jou nuwe huis
die Hemel se kombuis
met melktert
jamtertjies
hertzoggies
en jan smutsies
want jy bak
vir die dag
wat jou kinders
huis toe kom
terwyl jy sing:

Some broken hearts never mend,
some memories never end,
some tears will never dry;
my love for you will never die …

en ek sing saam

© Sophia Engelbrecht

Stuur jou gedigte na bydraes@roekeloos.co.za Digters is ook welkom om een foto te stuur vir publisering.

Sluit aan by die Gesprek

4 Kommentare

  1. Dis n ongelooflike mooi gedig wat my beste vriendin geskryf het aan haar ma in die hemel! Ons almal mis haar verskriklik baie en Sophia kon dit nie in beter woorde neer gepen het nie…

  2. Ek sluk so hard aan hierdie gedig, want ek voel en ek verstaan. Jy skryf hartlangs Soufs.

Lewer kommentaar

Lewer kommentaar