|
Gedigte kan HIER gestuur word.
Digters AnoniemForum vir die bespreking en beoordeling van gedigte in hierdie afdeling.
Digters Anoniem ...
www.mytafel.com
my naam is ek@mytafel.com
my vriende is gesiglose virtuele mense
met virtuele name
en ons kuier in virtuele kletskamers
ek, ek@mytafel.com
is een van die gesiglose skakels
in die wye netwerk
Susann Deysel
Klein gode
klein gode
in ons magtige tegnologiese koninkryk
heeldag met vingers en oë
vasgenael
in silikoonwêreldtjie
kommunikeer met medegode
deur druk van knoppie
gesigloos, gesigloos ken ons mekaar
klein gode
in ons oorvol tegnologiese koninkryk.
Susann Deysel
marionet in jou hande
staan ek aan my toutjies
reg om te dans op elke beweging van jou hande
elke dag laat jy my aan die toutjies dans
tot eendag dat jy my hoog op die kas gegooi
en vergeet
te lank was ek jou toutjiepop
noudat die toue gebreek,
kan ek nie op my eie dans
nou's ek 'n marionet
in die hande van my emosies
Susann Deysel
vlekvry
is ons al so vlekvry
dat trane maar net nog ´n verskynsel is?
is ons al so vlekvry
dat ons enige bande net kan breek?
is ons al so vlekvry
dat sonstrale net oor EK moet val?
is ons al so vlekvry
dat tyd net om Ek kan draai?
Susann Deysel
in die Stilte vang Visse mense
... as dit so stil is
voel dit asof ek op ´n rots
in die middel van ´n onstuimige see sit,
sout , eet my oë
en water, wil my meermin maak...
al wat my bo hou,
is vrees vir die ewigdurende stilte,
die donker isolasie
´n pêrelskulp omboei my hart.
so, keer ek terug na vasteland.
vasteland wil nog troos
skulp wegwring,
maar ampervis is nie meer heelmens...
gril vir warm troos
swem eerder in donker poel
...as dit so stil word,
verlang ampervis om weer heelmens te wees!
- Susann Deysel
soos ´n Modjadjipalm
soos ´n Modjajipalm troon sy majestueus.
´n Bosreus.
´n See van takke wat uitreik
´n Hand vol liefde in elke aanraking of gebaar
- net vir jou!
soms lyk sy skurf en vol dorings,
maar binne, lewe sy, groei sy
- net vir jou!
anderkere word sy rondgeswaai in die wind,
maar sy is verdraagsaam
en bly staan.
Wanneer die son fel neerpyn,
is sy ´n sonsambreel.
en as ´n warm traan neerplof
vee sy teer oor ´n sproetgesig
Soveel omgee is in haar
Dat sy ´n lang lewe streef.
Deur dor of oorvloed jare
staan sy by ´n jong Modjadji
- Susann Deysel
VlinderVrouKind
Ek kan weer vlieg!
Op die wolke
Saam die vlinders
Voor die wind
Ek is weer kind!
Op die wolke
Saam die vlinders
Voor die wind
Ek, enkelvrou!
Op die wolke
Saam die vlinders
Voor die wind
- Susann Deysel
die wens buite by die boompie
ek los ´n liggie in my venster
sodat jy kan sien ek´s tuis
en jy ook die pad na my kan kry
ek los ´n klokkie by die voordeur
sodat jy kan sê jy´s terug
en my kan wakker lui
ek los my wens by die boompie buite
dit sal saam jou inkom.
- Susann Deysel
www.mytafel.com
my naam is ek@mytafel.com
my vriende is gesiglose virtuele mense
met virtuele name
en ons kuier in virtuele kletskamers
ek, ek@mytafel.com
is een van die gesiglose skakels
in die wye netwerk
- Susann Deysel
Kralestring
vir RK
kraal vir kraal
ryg ek jou in
pynkrale, verlangekrale,
begeertekrale, hartskrale,
wens-ek-vergeetkrale
glip ´n skeidingskraal tussenin,
ek-verlangkrale,
staak-om-my-te-belkrale
hierdie string kan ek net nie neersit!
- Susann Deysel
| 
