Gedigte kan HIER gestuur word.

Digters Anoniem

Sondag Pinkstertyd 2000

Uit die deins; uit die bamboesmis, ry ons blind
teen die wit lig,
teen die watermerk van 'n ou son;
trek ons die kurwes van die berghang
soos 'n vinger oor 'n lyf soek
die draaie in en uit.

Die natgesypelde pad hang
Soos 'n spieël in die verblinding
'n swaar lig.

Ek sê daar is honderde engele hier,
maar ons sien net
die lighuisvinger se swart moskeehoed, 'n vreemde lengte
uit die niks waar skuim en meeue vandaan kom.

By Misty Cliffs aanbid die seemis uit tuimeldieptes
die omhoog van kaalgebrande kranse.
Met die laaste dringende reëns het die sandhange berg-af gebiggel
tot platgeryde vloedvlaktes oor die smal kronkelpas.
Die kreeffabriek se punte en torings hang gewigloos,
'n pastel doemsel.
Die kreeffabriek is op 'n geheim gebou.

Ek probeer alles onthou.

Onder in die pas op die koue douveld
waar die skaam son al twee ure tevore soos mis verdwyn het
lê 'n dampie wasem in 'n populierbos vasgeweef.

Ek het in dié aand se koud my vrae in antwoorde gebid,
oopoor vir die fluistering, vir die ligte lig.

- Inge du Plessis

Digters
A
B
C
D
E
F
G
H
I
J
K
L
M
N
O
P
R
S
T
U
V
W
Y
Z