Dagboek Kunstefeeste Musiekdagboek Teaterdagboek

Het jy 'n bydrae of resensie vir die Musiekafdeling? Stuur dit na .

Beenkamers en gange

Wat doen 'n digter met 'n al-kwynende lesersmark, 'n lesersmark wat boonop sku is om nuwe werk te ontdek? Jy maak soos Kabous Verwoed en bring jou poësie na die mense in die vorm van musiek.

Verwoed, 'n nuwe stem in die digkuns, het besluit om sy gedigte in 'n kompilasie (of dan dig-album) uit te gee as 'n kompakteskyf. Beenkamers en gange bevat van sy gedigte, in sy eie stem vertolk, ondersteun deur die komposisies van bekende musikante soos Gerald Clark, Lukraaketaar, Klopjag, Piet Botha, Arthur Dennis, Jonathan Martin en Henry Steel.

Tussen-in kan ook kort grepe uit liedjies gehoor word deur o.a. Amanda Strydom, Valiant Swart, Bacchus Nel, Jan Blohm en ander. Hierdie insetsels word dan in sg. 'kamers' verdeel, vervleg in die tematiese geheel wat voorgestel kan word as iets soos 'n gedagtewêreld (huis) met verskillende segmente (kamers en gange).

Anders as met sanger-digters soos Gert Vlok Nel, Koos Kombuis en die Buckfever Underground, word Verwoed se gedigte nie met sang vertolk in Beenkamers en gange nie. Sy praatstem sweef eerder soms strelend, soms ontstellend saam met die musiek, wat variëer in intensiteit na gelang van die toon van die gedig. Dit is dan ook moeilik om te bepaal wat eerste opgeneem is, stem of musiek.

Dit is duidelik dat die musikante hulle laat lei het deur die tema en gevoel van elke gedig met hul komposies. Dit is nie toonsetting nie, maar eerder iets soos 'gevoelsetting'. Hier staan veral die bydraes van Arthur Dennis (in "Om te help dat Madness tot verhaal kom") en Jonathan Martin (in "Tienrand Beautiful") uit.

Die gedigte handel oor dinge soos verlies, afsondering, smagting en het dikwels 'n siniese of ironiese ondertoon. Dit laat jou met 'n gevoel van genotvolle bitter nostalgie. Soos dit maar hoort met poësie.

Beenkamers en gange moet bes as 'n geheel beluister word. Dalk eerder afgeluister word, soos 'n vlieg teen die muur van 'n sielkundige se spreekkamer, of in die intimiteit van 'n verliefde paartjie se slaapkamer. Dit deug nie as agtergrondgeraas nie, tensy jy deur Verwoed se strelende stem aan die slaap gesus wil word. Al die verse is ook in die CD-boekie vervat vir verdere betragting.
Koop / Buy Beenkamers en gange MP3's ... (net een of almal)

(sien ook Kabous Verwoed se video's)

Musiek
A
B
C
D
E
F
G
H
I
J
K
L
M
N
O
P
R
S
T
U
V
W
Z
MUSIEKVIDEOS