Die ongelooflike avonture van Poppie, ‘n Suid-Afrikaanse vampier in Londen

Poppie is ‘n nuwe musiekteaterproduksie wat spesiaal vir Cornel van Zyl geskep is deur die bekroonde storieverteller Hennie van Greunen. Die produksie het by die 2005 Volksblad Kunstefees in Bloemfontein geopen en is nou op pad na Aardklop.

Die storie van Poppie en Greg is emotief en gevul met donker humor en skielike patos wat in die fantasiewêreld wat Greg skep, uiting vind. Poppie het so pas graad gevang by Kovsies. Sy is gatvol vir die studente wat in die Mystic Boer rondhang want hulle het die talent om diep te praat verloor. Sy is gatvol vir Karel, wat haar bangry in sy Colt bakkie op die plaaspaaie net buite die dorp. Sy is gatvol vir haarself, want wat moet sy nou maak met ‘n BA in Filosofie en Antropologie? Sien, Poppie het ‘n geheim: sy is soveel meer as net nog ‘n bleek Bettie met ‘n BA. Saans laat voel haar slagtande so ‘n bewing en dan.Dan besluit Poppie om te waai. Soos dit in Bloem lees: Go London or go Dewetsdorp. Sy Go London. Soos derduisende ander jong Afrikaners, vind Poppie haarself in ‘n stad met geboue wat ouer is as die Eurosentriese geskiedenis van Suid-Afrika. Dis ‘n amborstige stad, met ‘n underground sisteem wat soos ‘n lintwurm deur die sagte weefsel van die grond beweeg. En Poppie word ‘n carer. Haar eerste pasient: Gregory Perkins. Hy is 32, weeg 20 kilo’s en lei aan brittle bone disease. Maar hy het geheime. En hy is ‘n sci-fi fanatikus. Dis hy wat die waarheid in Poppie raaksien en dinge raak interessant.

Die regie word waargeneem deur Pedro Kruger, alombekend as spankaptein op kykNet se gewilde Liriekeraai en vir sy uitstekende werk in juis hierdie genre, waarvan produksies soos Blougat, Lyf, Pello en Oorlog getuig. Hy word bygestaan deur Marion Holm, wat die spelleiding hanteer. Marion is bekend vir haar werk op die Casper Rasper Show en ook as die nimlike Sussie, wat tans oraloor te sien is.

Cornel het drama studeer as KOVSIE en het in 2004 uitstekende werk gedoen in die grensverskuiwende kabaret, Die Hangkas Haas. Sy is tans vryskutaktrise wat die land deurkruis met produksies.

Lewer kommentaar

Lewer kommentaar