Kieslys

Close


*/

23 Augustus
2018
Verhale
586 keer gelees
(*slegs web-weergawe)

Ant’ Lemoentjie

Destyds, toe wewenaars nog gepraat het van opsit saam met ’n kers en gevry het met respekte was daar g’n slegheid aan die ding nie.

’n Plaat van Jim Reeves en ’n bos blomme was genoeg om die weduwee te oorreed om ’n maaltyd voor te sit met ’n ietsie soets na die ete voor die opsit begin. ’n Boer het gevry met mooi woorde; homself toegerus met digterlike woorde en romantiese prosa – biblioteekboeke, ma se boekrak boeke en ou skool opstelle.

Oom Faantjie Fynkyk het al wat boek gefynkam vir die vleiende dinge, maar wanneer ’n man wil opsit en jou inbors ook ’n hupstootjie wil gee, moet jy dieper praat as net biblioteek woorde. Oom Faantjie het hom gewend tot Salomo se Hooglied. ’n Man, dink hy, wat opsit en vry met Hooglied kan vir seker wees van ’n sitplekkie op die settee.

Ant’ Lemoentjie le Roux was ’n weduwee wat sterk en vol gestaan het in haar geloof en kerkskoene. Haar hare was narsing rooi soos ’n ryp lemoen, oranje wangetjies en kniekoppe soos twee nartjies van vloere skrop en Cobra politoer – ietwat skurf, maar ook nie so dat sy ’n laken oor ’n katel sal skif nie.

Gesange was haar bekoring. Die eensaamheid was soms te veel en dan het Ant’ Lemoentjie voor haar traporreltjie ingeskuif met haar Gesangeboek, die pedale getrap met ’n stewige paar voete, knussig in skaapwol pantoffels. Dan sing Ant’ Lemoentjie weemoedig, vals soos die traporreltjie. Trap-trap dat die potjie droë sewejaartjies op die rakkie dans en skud tot die laaste noot, ’n crescendo wat net betyds eindig voor die ruite bars.

En toe een aand kom klop Oom Faantjie Fynkyk aan die voordeur met ’n bossie dahlias en ’n Jim Reeves plaat onder sy arm. Ant’ Lemoentjie nooi die vryer binnetoe aangesien hy haar per briefie toestemming gevra het en sy op gegeurde lemoenbloeisel-papier toestemming verleen het. ’n Man wat darem skryf oor rooi granate, saffraan, die reuk van kalmoes en ’n ryp lemoen het Salomo se wysheid.

Die traporreltjie het stof opgegaar; die pedale styf. Vir jare daarna, wanneer jy verby Ant’ Lemoentjie se huis stap kon jy Jim Reeves hoor sing. Daar het ’n opsitkers gebrand in die voorhuis en daar was dahlias in die voortuin.




1 Opinie:

Gee jou mening







Gereeld gelees

11 Julie 2010
Verhale
Verklarende Afrikaanse Woordeboek
Die Verklarende Afrikaanse Woordeboek (waarvan die eerste uitgawe reeds 70 jaar gelede verskyn het) is die handwoordeboek waarin die grootste versameling trefwoorde in Afrikaans verklaar word.
08 November 2012
Verhale
Kort grappe
Jou ma is so kort, mens ...
27 November 2010
Verhale
Die mooiste Afrikaanse liefdesgedigte
Die vierde, uitgebreide uitgawe van Die Mooiste Afrikaanse Liefdesgedigte is nou chronologies georden, sodat lesers kan sien hoe die Afrikaanse liefdesgedig oor die afgelope eeu ontwikkel het.
07 Januarie 2009
Verhale
Gedigte van Anell de Beer
Wat 'n groot voorreg om deel te kan wees, en immers ek is bevrees. Ons is almal oud genoeg, om in die more te wroeg.
24 Mei 2012
Verhale
Kort grappies
Wat is die verskil tussen ’n voël en 'n vlieg?

Onlangse kommentaar

Afrique mon désir by die Fugard | Roekeloos
2018-09-16 08:49:06
[…] Afrique mon désir, kombineer Hofmeyr, bekend as ‘n meester van toonsettings, ...
Gedigte van Megan Samuels | Roekeloos
2018-09-15 08:58:58
[…] Digters […]...
Weer tyd vir Nommer 37 | Roekeloos
2018-09-09 08:32:35
[…] Nommer 37 is nou beskikbaar op DVD, Box Office en spog met splinternuwe musiekvideo deur L...

Advertensie

Hou jy van ons hulpbronne? Oorweeg asseblief 'n donasie in Bitcoin: 179nZqSyFmYPcvu4ZU733PgXBKUYXcy9DD | Ons toets tans ’n kode om wiskundige probleme op te los met behulp van gebruikers se blaaiers; om nie afhanklik te wees van advertensies nie.