Gedigte van Jo’ van Tonder

 

Indeks van digters

Stuur jou gedigte na bydraes [by] roekeloos.co.za Digters is ook welkom om een foto te stuur vir publisering.

 

Vir Valentynsdag

Ek bemin jou
nie vir wie of wat jy is nie
maar vir wat jou liefde van my maak,
vir die borreling in my as ek by jou is,
vir hoe jy my onweersdae laat sprankel,
hoe jy my lewe liefdevol aanraak,
hoe jy met teerheid na my kyk,
omdat ek absoluut wonderlik in jou arms voel
omdat jy my onvoorwaardelik bemin
omdat jy my eerste raak gekyk het
en omdat ek swymel as jy my soen …

Hierdie hartjie-kaartjie simboliseer ons liefdesreis saam:
drome, nagmerries, hoop, vrees, vrede, seën, avontuur, vervulling.

Ek gee hierdie simbool, maar eintlik gee ek soveel meer:
ek gee my soekende siel,
my mallemeule-emosies,
my digters-denke,
my middernag-drome,
my wederstrewige wil,
en my stukkies-en-brokkieshart.

Ek verwag nie die son, volmaan, verskietende sterre en planete nie,
al wat ek mag vra is om te deel in ‘n oomblik van geluk,
vir solank as wat die lewe jou aan my skenk …

 

Indeks van digters

Stuur jou gedigte na bydraes [by] roekeloos.co.za Digters is ook welkom om een foto te stuur vir publisering.

Lewer kommentaar

Lewer kommentaar