‘n Capricorn-verjaardag

Met ‘n Vonkelprop

Is ‘n laaste naestring geknip

En het my Bokkelok-lokkie 21 geword

‘n Jongvrou-lyf met ‘n klokkie-lag

Wat onafhanklik van my asemhaal

Onafhanklik dans, dartel en draal

 

Dis met ‘n traan in my oog my Kindjie

Wat ek jou saggies nog ‘n bietjie verder laat gaan

Dis met ‘n snik in my hart, my Kindjie

As ek trots toekyk, hoe jy op jou eie voete staan.

 

My grys-haar

Vanoggend het die grys haar weer vorentoe gelê

My opstaan was ‘n bietjie stadiger

En my lewenslus so effe min.

My vonkel so bietjie rou

 

Eens lank gelede het jy my gekies vir jou

Saligheid

Rustigheid

Vriendskap

Verliefdheid

Jy het gesê dat ek jou kalm maak

Jy het my liefgemaak

My weer mens gemaak

 

Maar vanaand voel ek tam – kan ek niks gee nie

Vanaand het ek jou rustigheid nodig

en soek ek die warmte van jou manwees

Want die grys haar lê weer vorentoe

 

Nog ‘n keer

En as ek weer kon kies

Sou ek na al my opsies kyk

Ek sou ons probleme opweeg

En ons ongeduld vergelyk

 

Ons hardkoppigheid beloer

En jou humeur met myne meet

Jou bakkie en my blikkie se waarde kry

En mooi dink oor hoeveel ons stry

 

En as ek dit oor kon doen, my Man,

Sou ek dit met ‘n lag weer doen

Jou stop langs die pad

En jou weer oopmondsoen

My Man:

Met ’n skok moes ek besef
dat my menswees se kern nie aan myself behoort.
Moes ek ervaar hoe jy ferm my hart hiet,
my siel steel,
my gees gebied.
Het ek wragtig vrywillig my hele lewe oorgegee?
Afgegee en afgeteken?
Is dit moontlik dat ek myself kon weggegee?
Besef jy dat in jou hand
is my hart asook die hef?

Die groter skok is egter
die besef dat ek presies is
waar ek wil wees.

By jou.

Dis wat ek wil hê.
Dis wat ek soek.
Dis my doel en my droom
Dis my wens.
Dis jy.
Dirk.

Aan jou wil ek behoort.
By jou wil ek wees.
Jy is die een – jy kalmeer my gees.
Jy kan my vervul.
Jy maak my vrou
Jy maak my heel.
Jy neem my so geheel en al oor …
… en dis al wat ek wil hê
Net jy, my Man.

Lewer kommentaar

Leave a Reply