Die lewe marineer ‘n mens.
Dít is die goue draad wat deur al die stories loop wat Marion Holm in haar nuutste een-vrou-vertoning, Holm: Ge-Marion-Neer, by die Absa KKNK gaan vertel.
Holm: Ge-Marion-Neer is ‘n komedie wat Holm en Chris Vorster saam geskryf het en waarvan Vorster die regie hanteer. Holm sê soos gewoonlik, gaan sy klomp stories vertel, alhoewel dit net dié keer met ‘n glas wyn in die hand gaan wees, asof sy by jou in die sitkamer sit en kuier.
“Daar is paar snaakse stories, ‘n paar mooi stories en dan is daar ook een of twee hartseer stories.” Dié stories pas alles by die marinade-tema in. “Mens kry verskillende marinades. Vir vis en hoender kry jy een marinade. Dan kry jy ‘n bietjie sterker een vir vark, nog ‘n bietjie sterker een vir skaap en dan kry jy een vir taai beesvleis, wat die sterkste marinade is — net so is die lewe. Daar is sekere goed wat gebeur met ‘n mens en dit wat met jou gebeur marineer jou, totdat jy sagter is, of geuriger aan die ander kant uitkom.”
Goed wat mens kan marineer sluit armoede, misdaad en die ouderdom in, sê Holm.
Dit is Holm se tiende een-vrou-vertoning. Sy sê sy sien haarself eintlik glad nie as ‘n komediant nie aangesien sy van mening is dat komediante stories self kan uitdink. Haar stories is gebaseer op eie lewenservaringe. “Ek vertel dit net op ‘n manier dat mense dit lyk my amusant vind.” Gehore gaan dus lekker kan lag maar “dalk ook ‘n traan pink”, sê sy.
Die kos-tema is ook nie per toeval nie. Holm sê sy is mal daaroor om kos te maak en gaan sommer so tussendeur die program vier marinade resepte vir die gehoor gee. Die gehoor hoef egter nie te bekommer om notaboeke en penne in te pak nie aangesien sy die volledige marinade resepte op haar webwerf sal laai.
Holm gaan ook op die verhoog verskyn in die komedie Die Van Aardes van Grootoor. Dit vertel die storie van die Van Aardes wat in die tydperk van die sensuurwette, die sensuurpanele baie besig gehou het. Vandag skater die gehore steeds vir die malhuisverlede. En soos gewoonlik, is daar ‘n kinkel in die kabel wat jou hard sal laat dink. Pieter-Dirk Uys het die teks geskryf en Albert Maritz behartig die regie. Holm sal saam met Anna-Mart van der Merwe, Esther von Waltsleben, Noxolo Bodlani, Pierre van Heerden en De Klerk Oelofse op die planke verskyn.
Verder bied die Absa KKNK 11 ander debuut-komedies aan:
Barry van der Linde bied aan — Geskryf deur Jaco Botha met Frans Swart as regisseur en Ben Kruger op die verhoog.
Ben, Babsie en Familie – ‘n skaterlag driedimensionele strokiestorie konsert — Teks en regie deur Lizz Meiring met Chris van Niekerk, Lizz Meiring en Melt Sieberhagen in die rolverdeling.
Die Leo’s — Met onder andere Sandra Prinsloo en Tobie Cronjé op die verhoog. Hennie van Greunen is die regisseur en Pedro Kruger behartig die musiek.
Lag jou g*t af — Met onder andere Emo Adams op die verhoog. Hy het ook die teks geskryf en staan die regisseurskoene vol.
My vrou se man se lyk se tas — Met Frans Swart as regisseur en onder andere Paul Lückhoff en Chris van Niekerk op die verhoog. Ray Cooney het die teks geskryf en Peet van Rensburg was verantwoordelik vir die vertaling daarvan.
Op die Pil en op die Paal? — Geskryf en opgevoer deur Carin Bester met Suzaan Keyter as regisseur.
Partners — Geskryf deur Susan Coetzer. Sy en Frank Opperman behartig saam die regie en sy is ook op die verhoog saam met Frank Opperman (jr) en Annerika en Gordon van der Spuy.
Seuns — Geskryf deur Theo Kleynhans en opgevoer deur Petro van den Heever. Willem Jansen neem die regie waar.
Sonde met die biere —Teks en regie deur Charles J. Fourie met Peter Butler, Dorette Potgieter, Leonard Moss, Carin Bester, Charles van den Heever en Christia Visser op die verhoog.
Titanik: Een yslike Avontuur — Geskryf en opgevoer deur Jody Abrahams en Christo Davids.
Die monster in die gang — Met Anthea Thompson, Waldemar Schultz, Greta Pietersen en Wessel Pretorius op die verhoog. Hennie van Greunen is verantwoordelik vir die vertaling en regie en Pedro Kruger is musiekregisseur. Oorspronklike teks deur David Greig.