Gedigte kan HIER gestuur word.

Digters Anoniem

Middag in die biblioteek

In die biblioteek is net ou mense
ou boeke
ou protespoësie
my graadvoog en haar kinders
en ek natuurlik.

Ek hou nie van my rooi naels nie,
ook nie van my rooi wange
of my vet vingers nie
ek hou nie
van protespoësie nie.

Wel, nie die gewones nie.
Ek hou nie van kabarette
oor Reënboognasies nie,
ek hou nie van die Mills & Boon rak nie
ek hou nie van die vuilgroen mat nie.

Tog spandeer ek baie middae hier
in hierdie godverlate tempel van
out-of-date kennis en verouderde taal
want waar anders gaan mens heen
om die tyd te verdwaal?

Dis Mei

dis koud buite
donker oggende, warm lakens
anys beskuit
warm asems op die spieël
en teen die ruit

verkluimde duiwekuikens
'n fratsbui reën miskien
my ma in haar japon
die grond wat kreun
die winter kom

Herfs is my ma

Herfs is my ma
wat voor 'n skemer kombuisvenster
beskuit knie.

Herfs is my ma
wat oor 'n laslappiekombers buk
en nog blokkies aan stik.

Herfs is my ma
wat kla oor die stinkhout se blare
en dit self opvee.

Herfs is my ma
skraal soos die vroegoggende
in haar beertjie-kamerjas as sy groet

voor ons skool toe gaan.

The protest

ingehandig deur eksamennommer
80022201940024
in 'n onbekende jaartal,
maar heel waarskynlik post-nuwe SA
is blou en rooi,
maar hoofsaaklik 'n
gevolglike pers
linodruk
van twee lyfies wat aan mekaar klou
'n kartonboks tussen hulle met
"Only God can save us now"
en massas massas agter hulle
wat almal betoog
teen die groot gevaar
die black death van moderne tye
teen AIDS
asof hul voetgestamp, hul
inkdeurdrenkte gesigsuitdrukkings
van protes
nou eintlik iets gaan maak.

Kuns is nutteloos

Slurp groentee uit
fine china cups,
luister cello concertos
van Elgar in die tuin
dis so so mooi
soos jy.

Lees al die classics,
Oscar Wilde, Homer
deur Alexander Pope vertaal,
moeilike poems
uit Auschwitz
se swart en gal aangehaal,

kan skets en skilder,
klavier speel
naaldwerk doen,
hare is perfekte bolla-lengte;
maar bieg nou: ek stik
in hierdie selfopgelegte korset se engte

vir al my sogenaamde kultuur
en intellek
kon ek maar netsowel
'n agtergrondskets gewees het
in een van al daai Jane Austens
waarvan ek al so baie gelees het.

Terug

Gedig

Die stem in my kom sê gereeld
vir my Jou Slet
jou Ding

en ja, daar is hartseer in my are
soos nikotien
dit laat my sing

op Terugverbeel se snare
op Lankonthou se asem
op vier-jaar-oud se maat

ek sien die prentjies daagliks
op die agterkante van my retinas
maar nou ja, dis laat

as die bokkievrou met jou kuif speel
en ek wil net sê
vat haar, vat haar vas

en moenie los nie.
Ek moor die stem deesdae uit
van as tot as

en ek vind wonderbaarlik vrede
in al die plekke waar daar eenkeer
wroeging was.

Mongool

Maak vir my
'n erdepot
en verf wit duiwe
skeef daarop.
Trek groewe vir
my bloed daarin
kom laat ons sing
kom laat ons sing

kom dat ons 'n somer
offer bring
trek groewe vir
my bloed daarin
en soen my op
my breë voorkop
en maak vir my
'n erdepot.

Mikroskoop

gereduseer tot minder as niks
en nóg minder
tot ek die hoekstene atomies
kan waarneem

maar selfs dan sien jy daar's eintlik
net nog 'n klein heelal
wat onverklaarbaar en duister
om homself kantel

nog raaisels om wetenskaplik op te los
of religieus te ignoreer
en so groot as wat ek is
raak als vir my uit fokus

want wat is ek dan meer as 'n halwe chromosoom
wat ronddryf in die endoplasma van die Groot Selstruktuur
kleiner as niks op hierdie oggend
van denkbeeldige blaar disekteer

Digters
A
B
C
D
E
F
G
H
I
J
K
L
M
N
O
P
R
S
T
U
V
W
Y
Z