Ariose, ’n passieprojek tussen drie musikante wat in Oktober 2020 gestig is, het reeds twee baie suksesvolle treffers – “Bly Jy Hier” en “Jy” – opgelewer.
Dié trio laat ook nie gras onder hulle voete groei nie en het besluit om die maand van liefde behoorlik te vier met nóg ’n oorspronklike vrystelling wat sommer diep in musiekharte gaan nesskop.
“Saam met jou” is deur Xander Filmalter, die manlike stem in die groep, geskryf en vervaardig deur hulle kitaarspeler en talentvolle musikant, Renier Henning. Heidi Henning, die roos tussen die dorings, het ook oudergewoonte vir soet hoendervleis mooi oomblikke gesorg met haar unieke stem en aanslag.
“Vir my gaan die liedjie oor daardie oomblik wat jy voor die liefde van jou lewe staan en met alles binne jou weet dat niks ooit weer dieselfde gaan wees nie, ongeag van wat in die toekoms gebeur,” verduidelik Xander. “Ek sien ’n vierjarige seuntjie in sy Batman-kostuum wat elke keer oor die bank duik as die buurdogtertjie kom kuier of die bruidegom wat sukkel om sy emosies te beheer wanneer hy in sy bruid se oë kyk. Natuurlik is die oomblik omring deur ’n groter storie, maar iewers tussen teleurstellings en oorwinnings, kom daar ’n punt waar twee mense besef dat hulle nie so ver sou kom sonder mekaar nie.”
Alhoewel die snit diep lirieke het, meen die drie dat dit sal aanklank vind by ’n wye gehoor en dat luisteraars die lekker energie en ritme sal geniet.
Volgens Renier het hy van die begin af geweet dat hierdie ’n liedjie is wat mense moet hoor: “Die koorgedeelte, wat eindig op ‘ek is soveel meer hier saam met jou’ maak dat jy jou vrou wil nader trek en herinner wil word aan hoekom jy haar gekies het. Ek hoop dat dit dieselfde effek sal hê op almal wat daarna luister, want dit is immers altyd lekker om ’n liedjie te luister wat jou armhare laat regop staan van lekkerte.”
Heidi stem saam dat hierdie duet soos die stukkies van ’n legkaart bymekaar gekom het om die perfekte eindresultaat te skep. “Liefde is so ’n opwindende reis en ek dink ons het dit mooi vasgevang in die liedjie wat amper soos ’n kinderlike sprokiesverhaal afspeel,” sê sy.
Die musiekvideo is deur die groep self verfilm en vervaardig en het reeds in Renier se verbeelding afgespeel voordat dit op kamera vasgevang is. Dit het ’n sprokiesverhaaltema en speel af in ’n woudagtige omgewing wat Xander na aan die hart lê.
“Ek dink die natuur/ woud is ’n metafoor vir die meeste verhoudings. Dis wild en wonderlik, maar jy kan verdwaal en weet nooit wat om die volgende draai vir jou wag nie,” deel Xander. “Die staproete waar die video verfilm is, is ’n plek waarheen ek en my honde gaan om te ontsnap van die alledaagse lewe en is daarom vir my baie spesiaal.”
Renier voeg by: “Ek wou al lankal ’n video in die natuur skiet en die prentjie van kronkelpaaie, hoë bome en lig wat deur die takke skyn van bo af, was altyd in my kop. Die sprokiestema wat deur die liedjie vleg, het die konsep lekker laat ontwikkel en my visuele konsep is gebaseer op The Brothers Grimm se prinsesse wat deur die woud hardloop.”
Oor die afgelope twee jaar, het Ariose baie geleer oor die musiekbedryf en dit geniet om hulle musiek oor die radio te hoor, hulle video’s op die kassie te sien en met verskeie joernaliste en radio-omroepers te gesels… maar dis nog lank nie die einde nie, want buiten vir hulle afsonderlike projekte (Xander se solo-loopbaan en Renier en Heidi se gospelgroep King’s Collective) het hulle nog baie planne vir die toekoms.
“2021 was ’n moeilike jaar vir baie mense, ons inkluis, en baie dinge wat ons wou doen het nooit gerealiseer nie. Tans werk ons hard aan vier of vyf nuwe liedjies en musiekvideo’s en is ons besig om aan ons lewendige optredes te slyp. 2022 voel soos ’n jaar waarin ons kan ‘reset’ en dinge anders aanpak,” sê Renier.
“Hierdie is ’n gemaklike popliedjie wat mense in hulle karre, sitkamers en saam met vriende kan luister. Dit het ’n lekkerluister wysie en betekenisvolle lirieke, wat enige persoon wat al ooit verlief was sal verstaan,” sluit Xander af.
Die enkelsnit is nou op alle digitale platforms beskikbaar. Kry dit hier: https://music.apple.com/za/album/saam-met-jou-single/1607698455
