Die gewilde liedjieskrywer en sangeres Luna Paige het vroeër vanjaar besluit om iets groots aan te pak: in die era waarin daar meestal enkelsnitte uitgereik word, het Luna besluit om nie net een vollengte album nie, maar tweé op te neem en op dieselfde dag uit te reik. Luna se Afrikaanse nuutskepping “Dis die dors”, asook haar nuwe Engelse album “Harmony,” was op Vrydag 12 April uitgereik. Dit is die eerste keer in 10 jaar wat Luna Paige nuwe solo-werk bekendstel.
Na die promosieveldtog van Luna se twee nuwe albums, berei sy nou voor vir ‘n wonderlike avontuur wat op 5 Junie 2024 afskop. Oor die volgende paar maande sal Luna Paige na lande reis wat haar op een of ander wyse geïnspireer of nuuskierigheid ontlok het. Sy sal haar reise in Madrid begin, vanwaar sy ‘n gedeelte van die Camino del Norte na Santiago de Compostela sal stap. Sy gaan 278.50km stap. Nadat sy haar kop en lyf langs die Camino skoongemaak het, sal sy Barcelona, Portugal, Italië, Griekeland, Nederland, België en Duitsland besoek. Paige sal soveel as moontlik kulturele ervarings absorbeer, maar ook deurlopend skryf soos sy inspirasie langs die pad vind. Sy beplan om met kunstenaars en organisasies wat die kunste benut om ‘n verskil in hul gemeenskappe te maak, te ontmoet. Met ‘n agtergrond in welsynsprogrambestuur, maatskaplike werk, die kunste, fondsinsameling en borgskappe, stel sy daarin belang om die sosiale impak-sfeer in Europa te verken – om ‘n bietjie insig te kry in hoe tendense in die buiteland aangepas en geïmplementeer kan word binne die Suid-Afrikaanse landskap. Wanneer geleenthede ontstaan om op te tree, het Luna haar arsenaal van byna 100 oorspronklike liedjies om aan impromptu-gehore op te dis. Reis saam met Luna op:
TikTok @luna_and_the_world
Insta @lunapaigesa
Facebook @lunapaige.singersongwriter
YouTube @discoverlunapaige
Twitter @lunapaige
Met haar terugkeer na Suid-Afrika sal sy op groot skaal toer en die musiek van haar twee jongste albums ‘Dis die dors’ en Harmony vier. Sy sal ook nuwe liedjies bekendstel wat deur haar reise geïnspireer is.
