Brecht (Edms.) Bpk.

Lanklaas het studente stem dik gemaak … gesê wat hulle wil sê, hoe hulle dit wil sê, vir wie hulle dit wil sê … is ons dan nie die generasie wat beskuldig word van apatie en ‘n gebrek aan opinie nie? Geen noemenswaardige opstande wat die geskiedenis omkeer, geen teaters wat afgebrand word nie (daar mag dalk ‘n verassing op jou wag?!) … als is net so half van semi chill …

Miskien, maar verseker nie in hierdie uurlange reis waarop 20 van die US Drama Departement se mees talentvolle kabaretstudente jou gaan neem nie. Hierdie groep, wat vir die afgelope tyd diep gedelf het in hulself en die werk van Bertolt Brecht en letterlik keel-vol daarvan is om beskuldig te word van halfhartigheid (en heeldag sit en series kyk op die netwerk in hulle koshuiskamers), stort persoonlike kapitaal in hierdie vriendskappy. Ons maak Brecht “ons eie”. Ons verklaar weer oorlog … so op ons manier … 50 jaar na sy dood. Ons praat vir hom en laat hom vir ons praat.

Jy kan ‘n ontploffing van idees, vraagstukke, woordkuns, ‘n verskeidenheid musiek en danse verwag. Ten spyte daarvan dat ons Brecht se werke as uitgangspunt gebruik, hoef jy nie ‘n Brecht-boffen of ‘n teater-junkie of ‘n arty farty te wees om hierdie produksie te waardeer nie …

In Brecht se eie woorde: “Omdat dinge is soos dit is, sal dit nie bly soos dit is nie.”