Vergeet diamante! ’n Vrou se beste vriendinne is haar ware juwele, veral wanneer die trouklokke lui en niemand heeltemal seker is wie die bruid se pa is nie.
In MAMMA MIA! staan twee generasies formidabele vroue sentraal. Donna en haar Dynamos, Tanya en Rosie, dra dekades se vriendskap, stories en waarskynlik ’n paar donker herinneringe saam. Intussen het Sophie haar eie ondersteuningspan in die vorm van besties Ali en Lisa, wat haar deur die emosionele mynveld van troubeplanning én vaderskapdramas help.
Die nuwe rolverdeling is tans hard aan die oefen om hierdie geliefde karakters met al hul energie, drama en ABBA-glans tot lewe te bring.
Die produksie speel van 3 September tot 11 Oktober 2026 by Artscape in Kaapstad, voordat dit van 16 Oktober tot einde November 2026 verhuis na die Teatro by Montecasino in Johannesburg.
Trek jou beste ABBA-uitrusting aan, bel jou vriendinne en maak gereed vir ’n paar uur se pure pret. Want soms het ’n mens nie terapie nodig nie – net ABBA, goeie vriendinne en ’n verhoog vol sequins.
