Cape Ballet Africa se weergawe van The Nutcracker land by die Kunstekaap met spits tone. Vars van ’n uitverkoopte Johannesburgse toer.
Op die klanke van Pyotr Ilyich Tchaikovsky se ikoniese partituur word die verhoog volgeprop met ’n 50-sterk ensemble wat draai, sweef en dramaties sterf (net om weer op te staan vir applous). Die internasionaal-bekroonde Maina Gielgud hou die leisels styf, terwyl Marcel Meyer se kostuums en Michael Mitchell se stel die verhoog omskep in ’n fantasiewêreld waar realiteit eenkant staan.
Verwag die groot treffers: “Dance of the Sugar Plum Fairy”, “Waltz of the Flowers” en die immer-soet “Kingdom of Sweets and Delights”. Ballet kenners sal knik met ernstige gesigte; nuwelinge sal fluister: “O, dis hoekom mense hiervan hou.”
Kersie op die koek? Die Kaapse Filharmoniese Orkes speel sekere vertonings regstreeks, en ander aande word hul bekroonde opnames ingespan — want selfs orkeste het ’n plan B.
25 Februarie tot 1 Maart. Kaartjies: R290–R790. Koop nou, of leef vir altyd met FOMO in pointe-skoene.
