’n Blouvin-tuna het gister vir ’n rekord ¥ 32,49 miljoen (ongeveer R 2,67 miljoen) verkoop by die Tsukiji-vismark in Tokio, Japan se eerste veiling van die nuwe jaar.
Die 342 kg tuna het die hoogste prys behaal sedert rekordhouding begin het in 1999 – sowat R 7 807 per kg.
Die reuse vis is aan die kus van Japan se noordelikste eiland gevang en is gesamentlik gekoop deur ’n sushi restaurant in Tokio se luukse Ginza-distrik en die Hong Kong sushi restaurateur Ricky Cheng. Sushi is Japan se nasionale dis en die land is die grootste verbruiker van blouvin-tuna.
Die tipe veilings vind plaas in weerwil van die WWF se versoek aan Japan om op te hou blouvin-tuna eet, tot en met die spesie se getalle gestabiliseer het. Die Japanese eet omtrent driekwart van die wêreld se blouvin-tuna.
Die blouvin-tuna bevolking in die Middellandse See het reeds met meer as twee derdes gedaal. Blouvin-tuna uit die streek word steeds onwettig gevang vir uitvoer na Japan.
Discover more from Roekeloos.co.za
Subscribe to get the latest posts sent to your email.
Lewer kommentaar