In die 21ste eeu besluit jy wat jy waar en hoe wil sien en hoor. Dis wat digitale burgerskap beteken. Hoekom dan nie ook van waar ook al jy is, saamgesels in ’n nuwe regstreekse versoek-, musiek- en leefstylprogram wat nie net vir jou gemaak is nie, maar wat jy help maak nie … op TV.

Met chatNou! kan jy jouself op TV sien – elke Maandag tot Vrydag van 16:00 tot 18:00 op kykNET NOU! (DStv-kanaal 146). Dis ’n twee uur lange regstreekse uitsending met aanbieders en kykers wat direk en interaktief met mekaar chat. Dit beteken jy kan inskakel en: jou gunstelingvideo opdra aan daai spesiale persoon; jou eie sosiale media-boodskappe op die skerm sien en self ’n onderhoud met die grootste celebs voer.

Die vier aanbieders is die voormalige NRG-sanger Stephan van Huyssteen, beter bekend as “Stephantasties”, die blogger-aktrise Ansu Visser, Jacaranda FM-omroeper Carla MacKenzie en die sanger-akteur Willem Botha.

chatNOU! gee ’n platform vir kykers om hul menings oor onderwerpe via sosiale media met kykers te deel. Dié program sal ook insiggewende onderwerpe bekendstel waaroor kykers gesprekke met mekaar kan aanknoop.

Onder die leefstylonderwerpe wat gereeld aangeraak sal word, tel flieks, musiek, mode, kos, gaming, tegnologie, vermaak, nuwe tendense, teater, ontwerp, boeke, reis, D.I.Y. en natuurlik – sosiale media en die groot sosiale beïnvloeders op verskillende platforms. Die aanbieders sal daagliks interaktief met kykers oor dinge soos dié gesels.

Deur die loop van elke program sal plaaslike en internasionale musiekvideo’s gespeel word. Daar sal ook herkenbare gesigte van regoor die mediabedryf wees wat via sosiale media met die kykers praat, vrae beantwoord en ons vertel wat hulle tans opgewonde maak, waarmee hulle besig is en hul menings lug oor verskeie relevante temas.

Elke kyker word dus genooi om elke weeksdag ’n gas op ’n waarlik interaktiewe geselsprogram te wees.

chatNou! aanbieders
chatNou! aanbieders

Lewer kommentaar

Lewer kommentaar