Virginia Lee Huldeblyk – ENCORE

Sommige liedjies is meer as net musiek. Dit is liedjies wat ’n mens onthou, wat jou terugneem na ’n bepaalde tyd, ’n plek of mense wat deel van jou lewe was. Dit is die soort musiek wat jare later steeds ’n glimlag, ’n traan of ’n gevoel van nostalgie kan wakker maak. Dit is die hart agter die Virginia Lee Huldeblyk, wat ná die besondere ontvangs van die oorspronklike produksie terugkeer met ’n spesiale ENCORE-vertoning op 14 November 2026, hierdie keer in die Vaaldriehoek.
Die produksie is geskep as ’n liefdevolle viering van Virginia Lee se musiek en
nalatenskap, met respek vir die liedjies wat oor jare heen deel geword het van soveel Suid-Afrikaners se herinneringe. ’n Plaaslike produksie met ’n groot hart.
Die ENCORE word gelei deur Yolandie, wat die produksie geskep en vervaardig het en ook as hoof-solis op die verhoog verskyn. Sy word vergesel deur Theonette Vogt as solis, ’n vyfstuk-orkes en agtergrondsangers, wat saam ’n volwaardige
verhoogproduksie skep waarin musiek, stories, herinneringe en emosie bymekaar kom.
Met heelwat van die talent wat by die produksie betrokke is wat uit die Vaaldriehoek afkomstig is, is daar ’n besondere gevoel van plaaslike trots aan hierdie ENCORE verbonde. Hierdie keer word die vertoning huis toe gebring.
Die produksie wil ook graag iets van die besondere gemeenskapsgees van die
Vaaldriehoek weerspieël. Plaaslike kerke en gemeenskapsorganisasies word betrek
met stalletjies en deelname, met die doel om rondom die vertoning ’n warm, eg Suid-Afrikaanse ervaring te skep, ’n geleentheid waar mense kan saamkom, saamkuier en die aand as ’n gemeenskap kan beleef. Want uiteindelik gaan hierdie ENCORE oor meer as net ’n verhoog. Dit gaan oor musiek wat ons onthou, mense wat ons verbind en herinneringe wat bly.

14 November 2026 | 18:00
Klip River Country Estate, Drie Riviere, Vaaldriehoek
Kaartjies: R150 per persoon
Besprekings: WhatsApp 060 299 7652