Die tipografie van Inglourious Basterds se titel spel dit eerste uit. Kort daarna hoor jy die musiek en dan weet jy, hierdie is nie ‘n oorlogfilm nie, ook nie ‘n drama nie, dit is ‘n Cowboy-fliek.

Die Basterds is ‘n groep Joodse soldate in Frankryk tydens die Tweede Wêreldoorlog. Hulle staan onder bevel van luitenant Aldo Raine en hulle jag Nazi’s. Die Basterds ondermyn die moraal van die Duitse soldate met die wrede manier waarop hulle Nazi’s teregstel. Elkeen van hierdie soldate probeer om ten minste 100 kopvelle van Duitse soldate te versamel.

So kry die Basterds toevallig die geleentheid om ‘n groot vis in hulle net te vang, so groot dat dit dalk die einde van die oorlog sal beteken. Adolf Hitler gaan in Parys na die film Pride of the Nation kyk. In Parys ontmoet die Basterds die bioskoopeienaar Shosanna Dreyfus. Haar familie is deur die Nazi kolonel Hans Landa voor haar vermoor en sy het haar eie planne met Adolf.

Die film bestaan uit ‘n aantal hoofstukke. Die eerste verskil tematies van die res. Dit beeld Shosanna se geskiedenis uit. Regisseur Quentin Tarantino is hier op sy beste. Die dialoog, drama, beligting, kamerawerk, redigering, klank, is alles met sorg uitgewerk. Hierdie hoofstuk stook die vuur van haat vir Nazi’s in ons harte.

Met haat in die hart kry ons die opeenvolgende hoofstukke. Die fokusis konflik, wat uiteindelik ontplog in ‘n orgie van geweld.

Inglourious Basterds

Aanhangers van Quentin Tarantino moet beslis hierdie fliek gaan kyk, maar as die Wilde Weste jou idee van vermaak is sal jy ook Inglourious Basterds geniet.

Regisseur: Quentin Tarantino
Met: Brad Pitt, Diane Kruger, Mélanie Laurent, Christoph Waltz, Daniel Brühl, Eli Roth, Samm Levine, B.J. Novak, Til Schweiger en Samuel L. Jackson

4½ / 5

20 Oktober 20090.3

(Stuur jou resensies na bydraes by roekeloos.co.za)

Related posts:

1. David Carradine 1936 – 2009
2. Namibië op oorlogspad