Gedigte van Jannike Bergh

Afrikaans

Afrikaans, ´n rooibokkie;
sag en sensitief, spring-spring
woord na woord
deur die blond en blou van ons volk
om verhale te vertolk

Afrikaans, ´n olifant;
grof en groot, trap kraak-kraak
tussendeur beelde van
bome, klowe, valleie…

Afrikaans – ons éie

Afrikaans, die maan;
dimensioneel, rond in jou mond
in Afrika waar jy staan
hiér kom jou magiese geluide vandaan
hoe mooi skyn jy op die stil, donker laan

Afrikaans, die Strandloper
die ossewa,
die Verskroeide Aarde,
die honger maag,
die boer wat waag

die Guerilla
die Vrede

die hond wat blaf
by Ingrid Jonker se graf,
die selfportret van Breytenbach,
sy woorde wat mág
– nes die André P. Brink
wat abstrak kan dink,
die Bos woorde waarin Stef besef
hoe mooi is die klanke wat sy ore tref

Afrikaans, die Voëlvry-vuis
van Koos Kombuis,
die Valiant Swart
wat kom klop aan jou hart

Afrikaans, die ruk en rol,
die gees en vlees van Kerkorrel …

Indeks van digters

(Stuur jou gedigte na bydraes by roekeloos.co.za)