Die sangeres Tina Turner is oorlede in die ouderdom van 83 in haar huis in Switserland. Sy was ’n inwoner van Küsnacht vanaf 1994 tot haar dood en het haar Amerikaanse burgerskap prysgegee nadat sy in 2013 Switserse burgerskap gekry het.
Turner was een van die mees geliefde vroulike rock-sangers wat bekend was vir haar charisma op die verhoog. Hiervan getuig haar rits treffers wat meer as 180 miljoen albums wêreldwyd verkoop het. In November 1967 het Turner die eerste vroulike kunstenaar en die eerste swart kunstenaar geword wat op die voorblad van die Rolling Stone-tydskrif verskyn het. Sy is twee keer in die Rock and Roll Hall of Fame opgeneem, saam met Ike Turner in 1991 en as solokunstenaar in 2021. Sy het altesaam 12 Grammy-toekennings gewen.
