‘n Vorige semi-finalis en kategorie-pryswenner van die Nasionale Jeugmusiekkompetisie, Myles Roberts, keer die week triomfantlik terug na die 2017-kompetisie as die gaskunstenaar by die finaliste galakonsert. Die geleentheid vind Saterdag 14 Oktober by die Hugo Lambrechts-Ouditorium in Parow, Kaapstad plaas.

Saterdag se uitvoering is ook ‘n tuiskoms na die plek waar die talentvolle fluitspeler met fluitlesse begin het. Myles het in 2011 in die eindronde van die kompetisie gespeel, waar hy as die wenner van die blaasinstrumente kategorie aangewys is.

Dié Saterdag (14 Oktober 2017) sal hy die Carmen Fantasie vir Fluit en Orkes, deur F Bourne speel. Resident-dirigent van die Kaapstadse Filharmoniese Orkes, Brandon Philips, is op die podium.

Ná Myles sy meestersmusiekgraad in fluituitvoerings by die Stellenbosch Konservatorium verwerf het, voltooi hy in 2017 sy verdere studie aan die Civica Scuola de Musica in Milaan onder die leiding van maestro Maestro Raffaele Trevisani.

Hy was onlangs deel van ‘n slypskool vir ‘n nuwe stuk deur Philip Miller en William Kentridge en sal sy oorsese studies met gereelde besoeke aan Suid-Afrika kombineer.

Vanjaar is 21 jong klassieke musici tussen die ouderdomme van 14 en 19 jaar gekeur om aan die kompetisie, nou in sy 33ste jaar, deel te neem.

Die wedstryd het Dinsdag 10 Oktober by die Hugo Lambrechts-Ouditorium afgeskop. Al die deelnemers speel in die eerste twee rondes, waarna 12 gekies word om in die derde ronde te speel. Die ses finaliste word Donderdagaand 12 Oktober aangekondig. Toegang is gratis vir die eerste drie rondes.

“Hierdie is die derde grootste musiekkompetisie vir klassieke musici in Suid-Afrika met meer as R145 000 se prysgeld op die spel. Die algehele wenner kry vanjaar ten minste R30 000 kontant en ‘n goue medalje,” sê Michael Maas, stigter en voorsitter van die Nasionale Jeugmusiekstigting (NJMS).

Oor die afgelope drie dekades het die wedstryd voorste musici soos Pieter Schoeman (leier van die Londense Filharmoniese Orkes), Jeffrey Armstrong (voormalige leier van die Kaapstadse Filharmoniese Jeugorkes), Sakhile Humbane (student aan die SA Musiekkollege, Universiteit van Kaapstad) en Eben Wagenstroom (studeer tans in Cincinnati, VSA), om maar ‘n paar te noem, opgelewer.

Die finaliste galakonsert op 14 Oktober begin om 19:00. Kaartjies kos R120, R90 vir pensioentrekkers, student en leerders. Besprekings kan gedoen word by Computicket 0861 915 8000, Shoprite en Checkers-winkels, of aanlyn by www.computicket.com.

Lewer kommentaar

Lewer kommentaar