WINDHOEK – Toeriste in Namibië het ’n nuwe uithangplek ontdek: in die middel van nêrens staan ’n werkende pienk yskas wat lyk asof dit uit ’n pophuis ontsnap het. Die toestel, wat volgens die Namibiese Toerisme Raad “die moderne oase” voorstel, het binne dae ’n Instagram-wonder geword.
Dis nie net vir vertoon nie – sy werk. Sy brom vrolik in die stilte en word glo drie keer per week hervul met koue Coke, Sprite en water wat belowe om “jou dors en identiteit te les”.
Die yskas, saam met ’n metaaltafeltjie en twee stoeltjies vir geselskap, staan sowat 20 minute vanaf die naaste teerpad op ’n stuk grond wat tot dusvêr net deur hitte en eksistensiële vrae bewoon is. “Dis vir die dors mense,” sê toerisme-amptenaar Elsabe Gawaxab, “maar ook vir diegene wat glo dat as jy ’n pienk yskas in die middel van die woestyn bou, mense sal kom kyk.”
Volgens plaaslike berigte het die yskas reeds in meer selfies verskyn as die Sossusvlei-duine. “Ek het net verbygery,” sê Duits toeris, Klaus Müller, “toe my vrou skree ‘STOP! Influencer alert!’ Nou’s ons drie dae hier, want sy wag vir die lig om reg te val.”
Omgewingsgroepe het intussen hul kommer uitgespreek. “Dis nie natuurlik nie,” sê ’n woordvoerder van Save The Sand, “maar dis wel mooi in die sonsondergang.”
’n Plaaslike gids, Petrus //Uiseb, meen dis net ’n kwessie van tyd voor daar ’n koffiewinkel langsaan oopmaak. “Dis hoe dit begin,” sê hy. “Eers is daar net ’n yskas, dan kom die Wi-Fi en dan kom die witmense met hul ringligte.”
Intussen beplan Namibië glo om nog twee oases te installeer: ’n neon rooi bordeel in die vorm van ’n skeepswrak op die strand in Hentiesbaai, en een wat lyk soos ’n wit wasmasjien “vir al die Suid-Afrikaners in hul viertrek voertuie wat hul sondes wil uitspoel”.
Een ding is seker: in die wêreld se oudste en droogste woestyn, het iemand uiteindelik ’n manier gevind om koel te bly — en dis pienk.
