Hei, mevrou Brown (dit gaan goed)

Daar’s nie einde aan Laurika Rauch nie. En dankie tog, sê haar duisende bewonderaars. Haar jongste album Hei, mevrou Brown (dit gaan goed) is haar 15de en dit verteenwoordig liedjies uit ‘n breë spektrum van die Afrikaanse liedjieskrywerskat. Om ‘n paar uit te lig: “Kom laat ons sing (1)” en “Kom laat ons sing (2)” is twee nuwe juwele van Christopher Torr wat ‘n aangrypende spieëlbeeld van mekaar vorm. Die eerste liedjie is ‘n vreugdevolle en ironiese saamsingliedjie oor die liefde, terwyl dieselfde liedjie met “Kom laat ons sing (2)” verrassend omskep word om kommentaar op die verganklikheid van die lewe en die liefde te lewer.

“Waar ek ook al ry” en “Reispsalm” is twee Koos Kombuis-skeppings – die eerste het hy in opdrag van Laurika op Gordonsbaaistrand geskryf en “Reispsalm” is ‘n liedjie wat hy reeds in 1996 in die Rynvallei geskryf het. Dit is egter die eerste keer dat die liedjie gehoor word. “Reispsalm” sal menige landgenote (veral ex-pats) se harte warmer laat klop van liefde vir en verlange na hierdie kontinent.

“Onthou” is ‘n skepping van Jeanette Cilliers wat op Laurika se vorige album, Die mense op die bus, gesorg het vir “Vanaand se maan”. Dit was so ‘n treffer dat Laurika vir Jeanette gepols het om nog ‘n liedjie vir die nuwe album te skryf. Tony Cox, die bekende kitaarspeler, het sy talente verleen aan die verwerking van Onthou en in sy eenvoud word dit eintlik ‘n duet vir stem en kitaar.

Die besonderse titelsnit “Hei, mevrou Brown (dit gaan goed)” is die werk van die jong liedjieskryfster Marlise Scheepers, tans ‘n tweedejaarstudent op Potchefstroom. Laurika het die liedjie die eerste keer gehoor toe sy beoordelaar was tydens Beeld/Geraas en Janus Musiek se Vuurdoopliedjiewedstryd. Dit was een van die drie wenliedjies. Dit is ‘n opgeruimde liedjie, maar die tema is ernstig. Onder meer handel dit oor die gedwonge verskuiwings van die laat vyftiger- en vroeë sestigerjare.

Laurika en Vusi Mahlasela se paaie het reeds in 1998 met “Samekoms/Kopano” gekruis. Laurika wou sedert daardie eerste ontmoeting met Vusi die liedjie “Sleep tight Margaret” opneem. Sy sing die liedjie reeds geruime tyd tydens haar verhoogaanbiedinge saam met die vier lede van haar orkes. Die insluiting van die liedjie, vol filosofiese oplossings vir die probleme van die lewe, was dus nie net op publieke aanvraag nie.

Die liedjie “Lord of the Dance” loop ook al ‘n lang pad saam met Laurika. In die vroeë tagtigerjare het sy vir Sydney Carter, skrywer van “Lord of the Dance”, leer ken toe hy in Suid-Afrika saam met Donald Swann was. Sy wou al van daardie dae af die liedjie opneem. Lord of the Dance is natuurlik in verskeie lied- en psalmbundels dwarsoor die wêreld ingesluit en al dikwels opgeneem deur ander kunstenaars. Laurika se weergawe van die wysie wat weer bekend gemaak is deur Michael Flatley in sy vertoning met dieselfde naam, is ook op hierdie album. Twee lede van die Dalada Celtic Ensemble het hulle talente verleen aan Lord of the Dance wat aan die liedjie ‘n outentieke Keltiese gevoel gee.

Gaan kuier gerus op Laurika se eie webblad vir meer besonderhede.

Lewer kommentaar

Lewer kommentaar