In 1887 ontmoet Annie Sullivan en Helen Keller mekaar – ’n ontmoeting wat hul lewens onherroeplik verander. Die 25-jarige Annie voel soos ’n gebroke legkaart, verkeerd aanmekaargesit, terwyl die 12-jarige Helen vasgevang is in ’n donker limbo – sonder die vermoë om te sien, te hoor of te praat. Wat volg, is ’n intense en roerende oorlog tussen twee gebroke mense. Dit is ’n stryd wat ontvou in veldslae rondom die eetkamertafel, kopskermutselings in gebaretaal; ’n oorlog om beide Annie en Helen se oorlewing. In ’n wêreld waar trauma al hoe meer afgewater en alledaags voorkom, bring hierdie storie van twee formidabele vroue – en die mense wat hulle omring – ons tot stilstand. Dit dwing ons om na te dink oor die lesse wat trauma ons leer, en die ongelooflike veerkragtigheid wat uit daardie lesse spruit. Sentraal tot Annie se stryd is die idee van taal – ’n onmisbare element vir Helen se geestelike groei. Annie verstaan dat taal vir die verstand net so noodsaaklik is soos lig vir die oog. Sonder taal sal die deure tot Helen se wêreld vir altyd gesluit bly. Hierdie produksie se briljante en ervare geselskap ondersteun die jong, fenomenale 13-jarige Judi Hattingh in die rol van Helen, soos sy haar eerste treë op die professionele verhoog neem. Met Annie+Helen keer Wordsmith’s Theatre Factory terug na die feeskringloop. Wordsmith’s Theatre Factory, een van die land se oudste onafhanklike Afrikaanse teatermaatskappye, was laas in 2017 by die KKNK met ’n toneelproduksie. Skrywer/vertaler/regisseur Hennie van Greunen en akteur/vervaardiger Pedro Kruger sien uit daarna om voort te bou op legendariese produksies soos Lyf, Op die vrou af, Dinsdae by Morrie, Rondomskrik en Shirley Valentyn.
MET Cintaine Schutte, Judi Hattingh, Bianca Flanders, Stian Bam en Eldon van der Merwe TEKS Hennie van Greunen, gegrond op William Gibson se The Miracle Worker, Helen Keller se The Story of My Life en Kim Nielsen se Beyond the Miracle Worker REGIE Hennie van Greunen BELIGTINGSONTWERP Andi Colombo STELONTWERP Rocco Pool KOSTUUMS Rouvé Hattingh ASSISTENTREGIE EN VERHOOGBESTUURDER Dhania Schultz VERVAARDIGERS Wordsmith’s Theatre Factory en Curro Create
1 April 2025, 10:30
3 April 2025, 09:30
4 April 2025, 14:30
5 April 2025, 09:00
6 April 2025, 09:00
SANW-ouditorium, Oudtshoorn