Marleé van der Merwe is ’n nuwe stem in die Suid-Afrikaanse musiekbedryf —’n bekroonde aktrise wat nou as dinamiese solo-kunstenaar haar eie pad stap. Met haar wortels in Johannesburg en ’n loopbaan wat verhoog, film, TV en nou ook die ateljee omvat, versmelt sy pop met gewaagde elemente van ander genres soos rock, folk en jazz. Haar musiek word gekenmerk deur slim lirieke en onweerstaanbare melodieë.
Bekend vir haar SAFTA- en Naledi-bekroonde vertolkings, bring Marleé daardie selfde emosionele gravitas na haar oorspronklike musiek—hoofsaaklik in Afrikaans, met Engelse invloede om ’n wyer gehoor te bereik. Vroulik maar sterk, afgerond maar onvoorspelbaar — sy is ’n allesomvattende kunstenaar wie se kreatiewe visie deur elke lied, video en visuele element vloei.
Marleé van der Merwe is meer as net ’n sanger—sy is ’n storieverteller, gereed om haar merk op die musiekbedryf te laat.
Vergeet van my klink dalk soos ‘n “break-up” song, maar dis eerder ‘n liedjie oor die kragtige skuif wat in jou binneste gebeur wanneer jy iemand of iets werklik vir ‘n laaste keer uitasem. Om weg te loop sonder om ‘n plek en energie in jou hart te hou vir ‘n ligte dosis wraak en verwyt, en stil-stil daai wond te verander in ‘n wapen. Vir party is daai wapen ‘n beter en mooier weergawe van die persoon of dít wat jou gebreek het, of dalk ‘n opgradering van jouself …
