My man – Jaccques Brel

Naas die operakomponis Giacomo Puccini is Jacques Brel waarskynlik die grootste liedmaker van die 20ste eeu. Herman van Veen glo net die feit dat hy in Frans geskryf en gesing het (en nie in Engels nie), verhinder dat dié mening allerweë gesteun word. In My man, Jacques Brel – in klinkende Afrikaans kan meer van dié wêreldkunstenaar en sy musiek geleer word wanneer dit op die Volksblad-kunstefees (12 tot 17 Julie) in Bloemfontein aangebied word.

Herman van der Berg
Herman van der Berg
Naòmi Morgan en Bernard Odendaal, beide van die departement Afrikaans en Nederlands, Duits en Frans aan die Universiteit van die Vrystaat (UV), het die liedere vertaal en Herman van den Berg is die vertolker. Morgan tree ook as verteller op. Odendaal en Morgan het begin deur ‘n dosyn van Brel se liedere in Afrikaans “om te dig” sodat dit steeds volkome singbaar is.

Hulle is onder meer geïnspireer deur Brel se verhouding met sy geboorteland en voorouertaal. Hy was trots daarop dat hy as ‘n Belgiese, eintlik Vlaamse, kunstenaar bekend was, al het hy in Frans gesing en in Parys, Frankryk, bekendheid verwerf.

So aangrypend as wat hy oor sy land kon skryf, so snydend sarkasties kon hy egter na ortodokse “Vlaamsheid” verwys. “Brel bekyk die wêreld met ‘n varsheid kenmerkend van ware digters. Vreesloos en bloed-eerlik. Maar ook met ‘n hart vol verwondering en mededoë.

“Eintlik word hy toenemend as singende digter gesien. Dit is dié “huwelik” tussen liriek en toonsetting wat hom as liedskrywer laat uitblink. Dikwels is sy liedere rêrig ‘mooi’, maar dis beter om te sê dat dit altyd ‘sprekend’ is — dat woord en musiek ewe ekspressief is.

“Die haat-liefde-verhouding met sy Heimat is iets waarmee talle Suid-Afrikaners sal kan identifiseer,” sê Odendaal.

Morgan is ‘n Brel-kenner en dus ideaal om die rol van Brel se vrou as verteller in te neem.

Odendaal het tydens die omdigting Van den Berg se Afrikaanse stem al hoe meer met dié van Brel vereenselwig.

Van den Berg het al twee CD’s uitgereik, Herman van den Berg en Proe die aarde , wat albei vir Samas benoem is.


Bernard Odendaal en Naòmi Morgan, Assosiaat Professore van onderskeidelik Afrikaans Nederlands en Frans by die UV in Bloemfontein.

bydrae: Bernard Odendaal

Lewer kommentaar

Lewer kommentaar