PRINCE ALBERT – Die Karoo is soveel meer as net skaap en stilte. In 2026 gebeur daar weer iets gevaarliks in die Karoo: jazz word losgelaat. Pianis en komponis Paul Hanmer span kragte saam met ou staatmakers van die Karoo Jazz Project — Ramon Alexander, een van Kaap-jazz se groot stemme, en Lynette Petersen, Outeniqua Hoërskool se jazz-opvoeder en dirigent — om jong musikante te leer dat improvisasie nie net vir stede en rookgevulde klubs bedoel is nie.
“Die Karoo Jazz Project (KJP) gaan nie oor toonlere en liedjies net voor die Journey to Jazz 2026 nie,” sê Hanmer. “Dit gaan oor toegang. Oor om jong mense van Prince Albert, Leeu-Gamka en verder die gereedskap te gee om hulself uit te druk, hul erfenis te verstaan en jazz met selfvertroue te praat — selfs met ’n Karoo-aksent.”
Waar jazz tradisioneel in stede floreer — met musiekgesprekke, improvisasie en gehoorlede wat weet wanneer om te knik — draai KJP die storie om. Jazz word kerk toe gevat. Skool toe. Gemeenskapsale toe. Die doel: ’n nuwe geslag plattelandse musikante wat nie net kan speel nie, maar ook kan komponeer en die verhoog deel met die land se bestes.
Volgens Ramon Alexander is dit juis die mengsel van Karoo Afrikaans en ’n jazzy sound wat gehore by die Journey to Jazz-fees laat regopsit. Hy meen selfs groot, tradisioneel Afrikaanse kunstefeeste soos die KKNK en Suidoosterfees sal moeilik kan wegkyk van ’n projek wat só selfversekerd sy eie nis bewoon.
Die Journey to Jazz 2026-program lees reeds soos ’n wie’s-wie van Suid-Afrikaanse musiek: Vusi Mahlasela, Paul Hanmer, Nomfundo Xaluva, Linda Sikhakhane saam met Paras “Sibalukhulu” Dlamini, Zawadi Yamungu, Yonela Mnana & The Soultee Sisters, en Amy Campbell. En asof dit nie genoeg is nie, word twee baie spesiale verrassings op 31 Januarie 2026 by The Dansvloer in die Swartbergpas aangekondig — ja, daardie Swartbergpas, UNESCO-goedkeur en al.
Met beperkte verblyf in Prince Albert en groeiende nasionale belangstelling, word musiekliefhebbers aangemoedig om vinnig te spring. Kaartjies kos R250 per persoon per vertoning en is beskikbaar op Quicket. Datums: 30 April tot 3 Mei 2026.
Plek: Prince Albert, Wes-Kaap.
Waarskuwing: Jazz mag blywende spore laat.
