innibos Sappi Boeke-crawl 2016

Die SAPPI boeke-crawl is jaarliks die hoogtepunt vir innibos-feesgangers wat op soek is na ’n unieke ervaring rondom boeke en musiek. Vanjaar vat jy die pad na Sudwala Lodge, Pierre’s Mountain Inn en tot diep in die maag van die Sudwala-grotte. Dit is soos pub crawling, maar hier word agter woorde en wysies aan gecrawl. Die crawling skop af by NG Westergloed se parkeerterrein waar feesgangers op ’n bus klim en al kuierende reis tot by Sudwala.

Vier verskillende venue’s by Sudwala is deel uit van die crawl. Ligte eet- en drinkgoed is op die spyskaart om die ergste koue en honger hok te slaan.

Sudwala Lodge se atmosfeerryke restaurant is die eerste stopplek. Hier gaan ons luister na stories van wyle Chris Barnard soos voorgelees deur Paul Eilers, afgewissel met sang en musiek deur Steffie le Roux, Werner Ferreira en Pieter Ganswyk. Dit is ’n gedeelte van die gewilde program Chriskras wat by die Woordfees, KKNK en RSG-kunstefees opgevoer is.

Dan stap ons na ’n intieme ruimte waar die Fiësta-wenner Wessel Pretorius verskeie gedigte uit die kanon van Afrikaner helde, legendes en mitiese figure voordra op sy eiesoortige briljante manier.

Nadat ons die steil kronkelpad baasgeraak het na die heuwelkruin, kuier ons verder op die oop dek van Pierre’s Restaurant met wye uitsigte eie aan die Laeveld. Sangeres Natascha C en pianis Henry-John Williams is ook eie aan dié landskap as Nelspruitse kunstenaars. Natascha C ontgin met haar ryk stem die wortels van haar taal: ’n hartstaal met sy oorsprong in Nederlands (haar huistaal), Frans (haar ouma se geliefde taal), Afrikaans (haar man se taal) en Engels (die taal van die 21ste eeu).

Die oer-oue hart van die Sudwala-grotte is die laaste luisterplek en hoogtepunt. Hier sal Marita van der Vyver, bekroonde skrywer wat al die pad uit Frankryk kom kuier, van haar verhale voorlees terwyl Elvis Blue die musiek verskaf. Die grotte sal eggo, en dié ervaring behoort jou lank by te bly.

Jy staan ook ’n kans om ’n SAPPI Voëlboek met klanklesers wat R1 200.00 werd is, te wen. Tydens elke crawl gaan daar ’n gelukkige trekking wees; maak seker jy kry ’n inskrywingsvorm.

Met woorde, sinne, verse, verhale en musiek is die SAPPI boeke-crawl ’n eiesoortige en unieke woordreis.

Met Paul Eilers, Steffie le Roux, Werner Ferreira, Pieter Ganswyk Nel, Wessel Pretorius, Natascha C, Henry-John Williams, Marita van der Vyver en Elvis Blue.
Datum en tyd: Do 30 Junie om 13:00, 15:00 en 17:00
Plek: Sudwala Lodge en -grotte
Tydsduur: 240 minute
Gradering: Volwassenes
Kaartjieprys: R302 (ligte verversings en drinkgoed ingesluit)
Busse vertrek vanaf NG Westergloed se parkeerterrein, Koraalbooon 36.

Natascha C
Natascha C

Lewer kommentaar

Lewer kommentaar