“Voshaarnooi” is pas opgeneem deur Chris Chameleon, met ghitaarbegeleiding deur legendariese Mauritz Lotz.

“Voshaarnooi” is ook die eerste enkelsnit vanaf die CD van die produksie, Flennie die snare wat eersdaags vrygestel word. Die regisseur van Flennie die snare, Frans Swart, sê hy wou net vir Chris en Mauritz op “Voshaarnooi” gebruik. “Dit is so ‘n ikoniese liedjie en ek wou graag die eenvoud daarvan behou het. Chris en Mauritz met Jaconell Mouton as musikale regisseur het vir my presies gegee waarna ek gesoek het. ‘n Briljante vertolking!”

Die res van die CD bestaan uit bekende en nuwe verwerkings van Boerneef se bekendste poësie deur onder andere Chris Chameleon, Anna Davel, Daniella Deysel, Laurika Rauch, Louis van Rensburg, Rudolph Pretorius en S Le Roux Marais.

Boerneef was skrywer, digter, leksikograaf en akademikus, en laat ‘n skatkis van prosa en poësie agter na sy afsterwe op 2 Julie 1967. En nou, meer as 50 jaar na sy dood, word Boerneef vereer in woord en klank in die produksie Flennie die Snare met ‘n sterbelaaaide rolverdeling en kreatiewe span. Chris Chameleon, Anna Davel, Johny Klein en Daniella Deysel deel die verhoog met Jaconell Mouton (musikale regisseur), Mauritz Lotz en Riaan van Rensburg. Frans Swart het die teks geskryf en hanteer ook die regie. Die produksie is moontlik gemaak deur die ruim ondersteuning van die Innibos Laeveldse Nasionale Kunstefees.

Hoewel Boerneef hom aanvanklik op die prosa toespits, slaan hy later oor na die poësie, eers met ’n paar gedigte in die verhalebundel Teen die helling en later met volwaardige digbundels. Sy volksverse bring vernuwing in die digkuns weens die aardsheid en moderniteit daarvan. Die musikaliteit en ritme is veral kenmerkend van sy gedigte. Dit is juis hierdie musikaliteit van sy poësie wat onder andere die komponis Pieter de Villiers geinspireer het om heelwat van Boerneef se bekendste gedigte te toonset, waaronder “Die berggans het ‘n veer laat val” en “Aandblom is ‘n witblom”. Dit was ‘n belangrike toevoeging tot die repertoire van die Afrikaanse lieder, en ‘n gunsteling van die wêreldbekende Suid-Afrikaanse sopraan Mimi Coertse.

Sluit aan by die Gesprek

1 Kommentaar

  1. Ons het die verhoogstuk bygewoon en toe al die weergawe van Voshaarnooi gehoor, wat ek saamstem musikaal ‘n meesterstuk is. Jammer egter dat Chris Chameleon met die heel eerste woord ‘n fout maak. Hy sing nl. “Bantam hom so,” maar Boerneef se woorde lees “Bantom hom so.” Die woord bantom (of bandom) (s.nw) beteken ‘n dier (of ander voorwerp) met ‘n wit streep om die middel. Wat Boerneef natuurlik, eie aan sy aard, in ‘n werkwoord omskep. Groete, Chris

Lewer kommentaar

Lewer kommentaar