Drie debuutproduksies wat van 23 tot 31 Maart by die KKNK, geborg deur Absa, op Oudtshoorn te sien was, is elk vir ses Kanna-pryse benoem.
Die stoele, ’n tragi-klug deur Eugène Ionesco, is benoem vir beste tegniese bydrae (Marthinus Basson se stel en kostuums), beste toneelaanbieding, beste debuutwerk, beste manlike speler in ’n hoofrol (Chris van Niekerk), beste vroulike speler in ’n hoofrol (Antoinette Kellermann) en beste regie (Marthinus Basson).
Die Swartmerrie, ’n plekspesifieke drama van die KKNK se bekroonde Karoo Kaarte-projek, is benoem vir uitnemende literêre bydrae, beste toneelaanbieding, beste debuutwerk, beste manlike speler in ’n hoofrol (Theo Witbooi), beste vroulike speler in ’n hoofrol (Chantell Phillipus) en beste regie (Neil Coppen).
Willem Anker se Patmos is benoem vir beste ensemble, twee benoemings vir beste tegniese bydrae (Pierre-Henri Wicomb vir musiek en Jaco Bouwer vir ontwerp), beste debuutwerk, beste vroulike speler in ’n hoofrol (Tinarie van Wyk Loots) en beste regie (Jaco Bouwer).
Twee dramas is elk vir vyf Kannas benoem. Philip Rademeyer se Goed wat wag om te gebeur is benoem vir beste ensemble, uitnemende literêre bydrae, beste toneelaanbieding, beste manlike speler in ’n hoofrol (Gideon Lombard) en beste vroulike speler in ’n ondersteunende rol (Antoinette Kellermann).
Monsters, ’n eksperimentele drama deur Niklas Rådström, is benoem vir beste ensemble, beste manlike speler in ’n ondersteunende rol (Ntlanhla Kutu), twee benoemings vir beste vroulike speler in ’n ondersteunende rol (René Cloete en Michele Burgers) en beste regie (Tinarie van Wyk Loots).
Drie produksies is elke vir vier Kannas benoem. Braam en die engel, ’n teksverwerking van Marietjie de Jongh se gelyknamige roman, is benoem vir beste ensemble, beste tegniese bydrae (Nico Scheepers & Nell van der Merwe vir stel en kostuums), beste kinderteateraanbieding en beste vroulike speler in ’n ondersteunende rol (Daneel van der Walt).
Ilne Fourie se debuutdrama Ken jy vir Dewie? is benoem as beste ensemble, uitnemende literêre bydrae (Ilne Fourie), beste debuutwerk en beste manlike byspeler in ’n ondersteunende rol (Joshwin Dyson).
Die klug Su’walla Kassam, een van die US Première Teaterfees-wenproduksies van 2023, is twee keer benoem vir beste opkomende kunstenaar of nuweling (Angelo Bergh vir sy spel en Mikyall Harris vir sy teks), beste komedie-aanbieding en beste manlike byspeler in ’n ondersteunende rol (Angelo Bergh).
Fietsry vir dommies en Roem: ’n Musiekverhaal is albei vir drie Kannas benoem. Fietsry vir dommies, uit die pen van Oudtshoorniet Tiffany Saterdaght, is benoem vir beste toneelaanbieding, beste manlike speler in ’n hoofrol (Eldon van der Merwe) en beste regie (Dean Balie).
Roem: ’n Musiekverhaal deur Deon Meyer en Coenie de Villiers, is benoem vir beste opkomende kunstenaar of nuweling (Nelandi Boshoff), beste tegniese bydrae (Stefan Benadé & Nicole Holm vir stelontwerp) en beste manlike speler in ’n ondersteunende rol (Eldon van der Merwe).
Twee nuwe kategorieë vir Kannas is vanjaar bygevoeg, om erkenning te gee aan die beste komedie-aanbieding en beste Lucky Pakkie-aanbieding. Stand-up het ’n tuiste by die fees gekry, met ’n groter aanbod wat 11 optredes deur van die land se voorste komediante ingesluit het. Lucky Pakkie-teater het ook teruggekeer na die KKNK en aan feesgangers die geleentheid gebied om alternatiewe teater in kort optredes te ervaar.
“Die Kannapaneel het oor nege dae by die KKNK meer as 100 produksies gesien. Dit was meet en pas om die skedule te laat werk, maar ook opwindend. Ons sou die nie anders wou hê nie”, sê sameroeper Felicia Lesch.
Volgens Lesch was die verskeidenheid van die program inspirerend. “Die terugkeer van dansteater met onder andere ikoniese Suid-Afrikaanse choreograaf en danser, Dada Masilo, asook Figure of 8 Dance Collective, het inhoud vir jonger gehore bevorder. Dit was ook hierdie jaar opvallend dat daar soveel meer kinderteaterproduksies op die feesprogram was, asook die hoë gehalte daarvan. Die uitgebreide program van stand-up-komedie was ’n welkome toevoeging en ons hoop dat daar volgende jaar hierop voortgebou word.”
Lesch sê verder dat die energie wat die KKNK se tweede Jeugkunstefees, aangebied in samewerking met die Wes-Kaapse Onderwysdepartement, gebring het, gevoel kon word. “Om produksies saam met die leerders te ervaar en hul genot in die produksies te beleef, was opsigself ’n hoogtepunt en gee nuwe moed vir die toekoms, terwyl dit ook die belangrikheid van die kunste onderstreep. Verder meer het Lucky Pakkie se 12 produksies met ’n verskeidenheid van humor, satire, rymklets, rieldans, musiek-met-stories, klankbane en animasie gedemonstreer hoe baie kunstenaars in 15 minute op hoogskreatiewe maniere kan oordra.”
Vir Lesch het die KKNK se bekroonde multidissiplinêre kunsteprogram, Karoo Kaarte, ook die afgelope drie jaar gegroei en regmatig deel van die KKNK geword. “Ons as paneel wil hierdie projek wat soggens vroeg reeds met begeleide staptoere begin het, maar ook visuele kunsuitstallings, ’n app, ’n grafiese roman én ’n uitmuntende plekspesifieke teaterproduksie ingesluit het, uitsonder. Dit is voorwaar ’n voorbeeld van hoe egte gemeenskapsbetrokkenheid in die kunste en by kunstefeeste móét gebeur”, sluit sy af.
Vanjaar se onafhanklike Kannapaneel was Lesch (sameroeper), Frazer Barry, Amelda Brand, Diane de Beer, Ilza Roggeband, Marianne Thamm en Haddad Viljoen. Die wenners word op Donderdag 9 Mei tydens ’n glansgeleentheid by Leopard’s Leap in Franschhoek aangekondig.
Die Herrie-prys, ’n spesiale NATi-prys, spesiale Kanna vir diens aan die KKNK en ’n Kanna vir uitsonderlike tegniese diens aan die KKNK word ook tydens die geleentheid oorhandig.
Vanjaar se Kannas word geborg deur onder andere Absa, ATKV, Castle Lager, Checkers, Crispin & Lisa Sonn, Franklin & Joan Sonn, Glenwood Travel, Herotel, Het Jan Marais Nationale Fonds, NATi, Ton & Anet Vosloo en Wicus Pretorius.
Die 29ste KKNK, geborg deur Absa, word van Dinsdag 1 tot Sondag 6 April 2025 op Oudtshoorn aangebied.
Die volledige lys van Kanna-nominasies is:
Kanna vir beste opkomende kunstenaar of nuweling
- Angelique Filter (The Old Man Who Thought He Had a Dog – teks, regie en spel)
- Angelo Bergh (Su’walla Kassam – spel)
- Evert Esterhuizen (’n Gegewe perd, ’n tert en ander diere – solo-uitstalling)
- Mikyall Harris (Su’walla Kassam – teks)
- Nelandi Boshoff (Roem: ’n Musiekverhaal – spel)
Kanna vir beste aanbieding: visuele kuns
- Colbert Mashile – The Dreams of Yonder, Untethered
- Evert Esterhuizen – ’n Gegewe perd, ’n tert en ander diere
- Richard Specs Ndimande en Dineke Orton – Becoming Animal (groepuitstalling)
- Malebogo Molokoane – A Re Tshamekeng (Kom ons speel)
Kanna vir beste ensemble
- Braam en die engel
- Goed wat wag om te gebeur
- Ken jy vir Dewie?
- Monsters
- Patmos
Kanna vir uitnemende tegniese bydrae
- Nico Scheepers en Nell van der Merwe (Braam en die engel – stel en kostuums)
- Marthinus Basson (Die stoele – stel en kostuums)
- Pierre-Henri Wicomb (Patmos – musiek)
- Jaco Bouwer (Patmos – ontwerp)
- Stefan Benadé en Nicole Holm (Roem: ’n Musiekverhaal – stelontwerp)
Kanna vir uitnemende literêre bydrae
- Maria van Wyk, Esther Engelbrecht, Shanell Brandt en Marquen Carstens – Bloedbande
- Neil Coppen en Tiffany Saterdaght – Die Swartmerrie
- Philip Rademeyer – Goed wat wag om te gebeur
- Ilne Fourie – Ken jy vir Dewie?
- Wessel Pretorius – ’n Lewe in die dag van ’n vrugtevlieg, ensomeer: Die ongewerwelde-trilogie
Kanna vir beste aanbieding: musiek
- Blommetjie gedenk aan my
- Kaapse kabaret met Leslie Kleinsmith en die Ramon Alexander Trio
- Nataniël: Nineveh Song
- Stef Bos: Bijna 30 jaar later
- Vier Panado’s en ’n Chardonnay
Kanna vir beste aanbieding: toneel
- Die stoele
- Die Swartmerrie
- Fietsry vir dommies
- Goed wat wag om te gebeur
- Rooilug
Kanna vir beste aanbieding: Lucky Pakkie
- Andi Colombo
- Hakkiesdraad
- Karli Heine
- Tankiso Mamabalo
Kanna vir beste aanbieding: kinderteater
- Bounced
- Braam en die engel
- Kosblik
- Rooi boeties
Kanna vir beste aanbieding: komedie
- Hallo, is Bettie wat praat
- KG Mokgadi: Weighing In
- Marc Lottering: So I Wrote That Musical
- Monika, It’s Me
- Su’walla Kassam
Kanna vir beste debuutwerk
- Die stoele
- Die Swartmerrie
- Ken jy vir Dewie?
- Patmos
- Vier Panado’s en ’n Chardonnay
Kanna vir beste manlike speler in ’n hoofrol
- Chris van Niekerk – Die stoele
- Eldon van der Merwe – Fietsry vir dommies
- Gideon Lombard – Goed wat wag om te gebeur
- Jefferson J. Dirks-Korkee – Rooilug
- Theo Witbooi – Die Swartmerrie
Kanna vir beste vroulike speler in ’n hoofrol
- Antoinette Kellermann – Die stoele
- Chantell Phillipus – Die Swartmerrie
- Jana Cilliers – Veelhoek
- Melissa Myburgh – Die vegetariër
- Tinarie van Wyk Loots – Patmos
Kanna vir beste manlike speler in ’n ondersteunende rol
- Angelo Bergh – Su’walla Kassam
- Eldon van der Merwe – Roem: ’n Musiekverhaal
- Joshwin Dyson – Ken jy vir Dewie?
- Ludwig Binge – Veelhoek
- Ntlanhla Kutu – Monsters
Kanna vir beste vroulike speler in ’n ondersteunende rol
- Antoinette Kellermann – Goed wat wag om te gebeur
- Daneel van der Walt – Braam en die engel
- Angelique Filter – The Old Man Who Thought He Had a Dog
- René Cloete – Monsters
- Michele Burgers – Monsters
Kanna vir beste regie
- Neil Coppen – Die Swartmerrie
- Marthinus Basson – Die stoele
- Jaco Bouwer – Die vegetariër
- Jaco Bouwer – Patmos
- Dean Balie – Fietsry vir dommies
- Tinarie van Wyk Loots – Monsters